日記 2006年09月19日
BuBu隻腳粒嘢冇乜事喇,好嘢,仲可以通屋走,騰嚟騰去,好忙碌咁!
放工去卓爾居睇醫生,所以去咗”太興”食飯,食咁多次太興,都未真正見過”八寶飯”嘅實物,老陳為咗滿足我嘅好奇心,做咗一次大胃王,叫嚟食下,而我就食焗叉燒喇!
(真係有八款嘢,仲加兩條菜),食完之後佢個金魚肚又現身了,所以要漫步行返屋企,”懶”浪漫嗰隻咁!
(0)
日記 2006年09月18日
可能行得太多,夜晚瞓覺隻腳突然抽筋,呢個情況都好耐冇出現了,瞓醒仲有啲痛!
出門口之前,BuBu竟然無端端嘔,我同老陳都緊張起嚟,佢個樣不知幾淒凉,好彩隔咗一陣冇乜事,我哋就放心走人喇!
一放工即係返去睇BuBu,佢不知幾龍精虎猛,玩得,食得,瞓得,真係累我嚇餐飽!
日記 2006年09月17日
晨早起身準備出發去”濕地公園”,我哋一行七人入到去先參觀室內嘅嘢,再去睇貝貝,
然後就要出去室外睇嘢,全程睇哂嘅話要成個半鐘,但係咁炎熱同咁哂嘅天氣下,老陳話中暑都似,所以行咗一段路,我哋就折返走人,而下一站係….”BuBu's Secret House”,歡迎歡迎!
BuBu從未試過咁多人嚟屋企探佢,所以佢極之興奮,用咗半個鐘時間先平復番個心情,真攪笑!
夜晚出返去亞嫂度食飯,慶祝姪仔同奶奶生日,因為佢哋咁啱係同一日生日!
(Happy Birthday to you!)
結果差不多十ニ點先返到屋企大覺瞓,因為連續兩個禮拜嘅假期,都過得非常充實,由朝玩到晚,實在太攰了!
日記 2006年09月16日
今日PP島同Frankie嘅千金都上咗嚟公司,令到沉悶嘅氣氛都變得熱鬧起嚟,時間都過得快啲!
智者專登抽空兼長途跋涉咁入嚟同BuBu玩,由於夜晚我同老陳有個飯局,所以差不多六點,大家都要撤退,BuBu梗係依依不捨咁望住智者走啦,皆因BuBu同智者玩得咁Happy.
夜晚約咗成班人喺淘大嘅明星食飯,慶祝雞仔明生日,而佢就送咗啲禮物俾我哋,就係”炸彈“一個,真係恭喜哂!
日記 2006年09月15日
哇,真係快,又到Happy Friday喇,不過聽日Long Week,捱多半日先可以抖一抖喇!
BuBu隻腳又生咗粒嘢,睇見佢就住就住咁行,真係心痛死我,好彩今日已經好番啲,依時搽藥水,應該冇會仔快冇事嘅!
日記 2006年09月14日
雖然出面仲係唔好天,但係今日公司裡面嘅空氣係有史以嚟,最清新,最舒服,完全好似水咁”無雜質”! 
(一個字”正”)
放工僅僅搭到架邨巴,因為尋日搭完覺得幾快,而且架車又冇遇到啲鼻鼾人,超寧靜,所以今曰同尋日一樣上車瞓到落車,好瞓到差啲連口水都流埋呀!
一返到去見到BuBu好雀躍,睇嚟佢應該叉番足啲電,準備大搗蛋計劃喇!
日記 2006年09月13日
今日係伴娘Anna嘅生日,
“Happy Birthday!”
今日又落大雨,又凍,個天咁黑,真係唔想起身喇!
放工一返到屋企,行咗一步準備開燈, “Oh so lucky!” …竟然踩”唔唔”,BuBu去完渡假返嚟之後,瘋狂疴臭臭,唔通佢食得多得滯?
