日記 2006年08月19日
因為要裝爐,所以唔可以俾BuBu周地行,唯有破例俾佢上張床度啦!我同佢一樣,滯留咗喺張床度,無聊地影下傻BuBu,同食下尋日買嘅戰利品!
結果一整就整到七點,又要執餐飽,好辛勞呀!
今日要祝隅言小姐,生日怏樂! 
(0)
日記 2006年08月18日
原本諗住今年唔去美食博覽,但係睇完報紙同啲雜誌係咁登啲好吸引嘅嘢食出嚟,所以放工喺冇任何準備下,我同老陳約埋平時好難約嘅二家姐,一齊去掃貨,睇下有冇好嘢嘛!
七點鐘入去,行到十點會展清場,裡面好迫,成村人排隊試食,有一檔個Sales仲話”幫襯下啦,唔好食完就走啦!”,啲人真係試食完就走,好攪笑!不過裡面啲嘢大部份都係减好少,所以我都係買咗啲出面少見或者未有得買嘅嘢多!
最後我哋嘅戰利品總共有成六袋,簡直係破咗上年嘅紀錄,果然係”經濟好咗喎!”
(掃咗六大袋貨)
(濕貨產品,有餃子啦,甜品啦…)
(瑞士雞翼,雞脾,仲有瑞士鴨半只)
(乾貨小食)
(好抵嘅三十蚊二十包素麫,仲有老陳食麫必需品”辣椒醬”)
(東海堂嘅冰燒月,仲有送俾BuBu嘅豆豆公仔)
(要特別介紹以下呢個”義美蛋糕”,家姐話喺臺灣好出名架,成四十幾蚊盒架!)
日記 2006年08月17日
晏晝同PP島,隅言小姐去咗”阿斗官”食,而亞B就因為要開會,同唔到我哋食,所以今日嘅”派紙巾”服務就暫停咗一天喇!
(平時呢個服務係亞B嘅餐前指定動作嚟架,真係”Appreciate”喇!
)
我哋嗌咗三個餐,其中一個餐係沙薑雞,仲要半隻,真係誇張呀!
講到食,夜晚終於食咗”獅子頭菜飯”,不過我嘅評語俾唔到Good Good Good,只可以講一般難食,排骨菜飯好佢十八倍呀!
返到屋企,BuBu預備咗個”雙料必殺技”俾我哋嘆,做完一輪清場功夫之後,啲獅子頭菜飯都消化哂,可能BuBu知道我嫌個飯難食啩,咪幫下我囉!
日記 2006年08月16日
今日啲時間過得好快,因為不停有嘢做,非常充實!
前幾日,PP島帶咗啲花花細個時嘅相俾我哋睇,好得意,肥嘟嘟,真係好想”滅”佢個面豬”登”呀!
BuBu夜晚好乖,冇乜點出聲,連我哋食飯,佢都冇嘈,因為佢又一個新玩具,要將啲小食塞入去,等佢慢慢整番出嚟,都可以玩好耐架,玩完咪又瞓囉!
努力中
食極都食唔到,想發脾氣咁
終於食到啲喇,幾開心
日記 2006年08月15日
尋晚老陳成點先返嚟,BuBu見佢返咗嚟先收聲,我想瞓都冇用,因為BuBu會不斷嘈,等到佢返嚟先可以靜,所以攪到今朝要飲番杯咖啡提下神!
喺公司我發現有啲人好識制造”Suddenly“,例如夾哂時間咁講電話逃被開會,到要執板喇,就即刻夾啱時間約人開會,仲要扮哂好”Suddenly“咁!
所以今日我都要”Suddenly“一下,仲一連三個㖭!
第一個”Suddenly”—-Yurdanur返咗嚟香港,約咗我哋飲茶,仲好”Suddenly“話預備咗啲禮物送俾我哋,好靚架!多謝哂!(我要咗隻碟仔,我仲連埋豬頭B嗰隻豉油碟變成頂帽帶喺唐老鴨度,So Cute)
第二個”Suddenly”—-同老陳諗緊食乜之際,我好”Suddenly“决定煮飯,因為雪櫃仲有啲菜!
第三個”Suddenly”—-食緊飯途中,BuBu好”Suddenly“咁便便,仲要係以前從未試過架,簡直激死我,估唔到BuBu都學識”Suddenly“!
日記 2006年08月14日
今日我個Buddy–亞B正日生日,喺呢度祝佢生日快樂!
老陳今日上咗大陸嘅office,要好夜先返,唯有快啲返屋企陪BuBu啦,呀唔係,正式嚟講係BuBu陪我至真,不過返去途中遇上大塞車,攪到八點先返到去!
今日仲要特別鳴謝兩個人:
多謝PP島知道我唔鍾意將出前一丁過冷河,所以送咗日本版俾我,佢話呢隻皂水味冇咁重,多謝多謝!
多謝豬頭B見到我隻腳仲腫緊,所以食晏幫我買咗支去瘀膏俾我揩,多謝多謝!
日記 2006年08月13日
尋晚瞓得好辛苦,因為一伸直隻腳就痛,而且仲係腫緊,開始變色㖭!
雖然隻腳痛,但都要出去睇煤氣爐,最快禮拜六就有人上嚟裝喇,好嘢!
原本買哂餸煮飯,點知經過見到太興開咗喎,咁就唔理喇,食咗先講,但係返去都要煮啲聽日帶,因為隻腳痛,唔想出街食!
