日記 2006年08月05日
追哂劇仲唔俾我瞓番夠本,起身食咗少少嘢再繼續瞓,一瞓瞓到五點,冇錯係五點呀,簡直係補番哂成個禮拜瞓唔夠嘅時間呀!
瞓飽哂,梗係要出街行下啦,原來屯門市廣場新起咗層新嘢,其中有間叫做”MW”,好似Disney專門店咁,好多米奇,唐老鴨嘅靚嘢賣架!
(0)
日記 2006年08月04日
終於睇哂惡作劇之吻喇,去到最尾嗰幾集,真係好好睇,好感動,期待續集快啲出啦!在這讓我回味一下吧!
不過BuBu期待嘅新廁所,巳經送到喇,之前仲擔心佢用唔慣,點知一放好佢就即刻享用,一副好enjoy嘅表情,我諗佢好快就習慣喇!
BuBu的摩登茅廁大公開
日記 2006年08月03日
今日發生咗我人生最瘀而且應該都算最多人注目嘅一件事,就係放工落到街,見到架Shuttle Bus準備開,由於要趕住去攞番部Notebook,所以非搭呢班車不可,咪諗住”徑步”追囉, 點知遇着超勁大風吹過嚟,唔敢行又唔敢企, 唔知點算好,身邊又冇嘢扶,只係見到遠處有兩個弱質女子同一個女管理員一齊扶住碌柱,我就用我僅餘嘅力量行過嗰碌柱度,紮番好個馬先, 點知嗰架車竟然停低等埋我, 呢刻我先知道全車人好似睇表演咁,望哂成個過程,我只好低着頭披住髮咁上車,落車嘅時候更不幸地撞到露絲雅小姐,所以佢都係目擊者之一!
都唔明白飛機同船都停航,出面啲嘢又被大風吹跌哂,人都被風吹得郁,咁鬼危險怎麽可能不掛八號風球呢??????
天文台,你令我太失望了!
日記 2006年08月02日
亞B同隅言小姐都SKL,唔會因為尋日嘅Pokka啩,希望佢哋快啲好番啦!
今日公司好鬼靜, 只係間中嗰兩個”算爆三寶”喺度大聲講嘢, 佢哋真係名符其實嘅”算爆三寶”嚟架, 因為佢哋100%符合哂嗰三寶!
“縮骨,算爆,Lolandto(老X土)”
不過我唔會再理呢D廢柴,因為佢哋呢班新人係瘋人院病人, 理佢哋咪即係做咗瘋人院院長!
都係返屋企睇直樹好過!
日記 2006年08月01日
超眼瞓,超眼瞓, 超眼瞓, 超眼瞓, 超眼瞓,
全因為湘琴見到直樹佢……., 仲之就淒凉啦!
晏晝食完Pokka, PP島, 隅言小姐同我都一齊將啲蚊放生, 歷時係整個下午, 只有亞B冇參與其中, 唔知係咪想儲多啲, 揾日一次過狂放呢?哈哈!
日記 2006年07月31日
實在太眼瞓了, 腦海中仲不斷play緊惡作劇之吻, 但係返到公司見到啲e-mail不得不醒, 實在太多report, 而且又要進行每個月都要做嘅三”合”工程,呢個三”合”工程拍得住嗰個三”峽”工程咁大型架!
放工仲要去埋”寵物城”入下貨, 主要都係因為要幫BuBu買個新廁所, 最後買咗個青BB顏色俾佢, 不過BuBu要等到星期五送貨之後, 先可以享用呀!
BuBu仲託我幫佢買份禮物送俾佢個新老友Woffy小姐, 希望佢鍾意啦!
日記 2006年07月29日
哇,今日一起身已經兩點鐘,望出去仲落緊雨,最適合留喺屋企抖下,不過之前應承咗老陳陪佢去睇套戲,所以非出街不可,啱啱好嘆個茶,就可以夠鐘睇喇!
老陳要睇嗰套戲,咪就係差不多陪住佢成長嘅“龍虎門”囉,
—-> 
佢就最鍾意睇打戲架喇,話哂有甄子丹喎,不過套戲真係超正,超勁,冇悶場,甄子丹又型,—-> 
總之就係Good Good Good啦!
返到屋企梗係嚟番個”請勿騷擾”嘅㷛碟時間啦!
最後提提大家,我個Blog轉咗背景音樂喇,呢首歌係Hata先生曾經介紹俾我聽的!
係日劇”With Love”嘅主題曲!
