日記 2006年09月24日
九龍灣嗰間”大榮華“終於開咗喇,
所以約埋奶奶去嘆茶,
入到去見到無限量供應嘅”奶皇馬拉糕“,
而且只係剔紙就有,唔駛好似元朗嗰間分店咁,
排哂長籠仲唔係一定有份,梗係即刻叫番兩碟啦,
因為真係超超超超超超超好味!
(曾經何時,智者都覺得太好味喇,
所以試過山長水遠,
突登入元朗買番幾舊馬拉糕出市區㖭!)
(0)
日記 2006年09月23日
今日係去睇專科嘅日子,聽三家姐講呢個廖顯榮醫生幾好架,仲好有經驗㖭,所以我非去不可啦,結果呢個名醫話我冇事,所以我終於放下心頭大石了,不過嗰度嗰位貌似”白韻琴”嘅護士,啲態度就衰到死喇,竟然話佢哋收慣大紙,冇五蚊咁零碎嘅散紙找俾我,既然佢咁串,我咪叫佢唔駛找囉,結果佢咪又係死死地氣找俾我,都唔明個醫生咁有”醫得”,個護士就咁冇”口得”!
仔仔嗰套”深情密碼”出咗喇,仲要有個唔駛諗嘅價錢,所以一時間我連”我們結婚吧”都買埋,啱啱先叉咗電嘅我,睇怕好快就又冇電架喇,哈哈!
日記 2006年09月22日
終於到咗星期五,呢個星期好似過得好慢咁!
好多公司開始送月餅嚟,而且仲有個生果籃㖭,所以晏晝大家就進行咗個切”月”餅儀式,同埋分生果活動,我即時影咗幅相send俾PP島,等佢都可以同我哋一齊分享嘛!
日記 2006年09月21日
PP島今日要”先行告退”,搬去展貿喇,當佢臨出公司門口嘅時侯,豬頭B”一定”會做出一啲令人好頂唔順嘅嘢,就係嚟一招”叔叔抱抱”攬住PP島,然後仲要整多句”出咗呢個門口千祈唔好回頭望呀!”(呢個豬頭B真攪笑)
呢輪少咗幫BuBu影相,見BuBu啲毛又長咗啲,所以就影低佢啦!
日記 2006年09月20日
今日係小花嘅牛一大日子,祝佢生日快樂!
份單終於攪掂,所以爸爸個舅父約咗我同老陳食飯,呢次飯局梗係要預埋爸爸呢個”中介人”啦,所以去咗又一城食!
結果食下傾下又到九點,之前先叉番啲電,睇嚟我又要再叉過了,
實在太眼瞓喇!
日記 2006年09月19日
BuBu隻腳粒嘢冇乜事喇,好嘢,仲可以通屋走,騰嚟騰去,好忙碌咁!
放工去卓爾居睇醫生,所以去咗”太興”食飯,食咁多次太興,都未真正見過”八寶飯”嘅實物,老陳為咗滿足我嘅好奇心,做咗一次大胃王,叫嚟食下,而我就食焗叉燒喇!
(真係有八款嘢,仲加兩條菜),食完之後佢個金魚肚又現身了,所以要漫步行返屋企,”懶”浪漫嗰隻咁!
日記 2006年09月18日
可能行得太多,夜晚瞓覺隻腳突然抽筋,呢個情況都好耐冇出現了,瞓醒仲有啲痛!
出門口之前,BuBu竟然無端端嘔,我同老陳都緊張起嚟,佢個樣不知幾淒凉,好彩隔咗一陣冇乜事,我哋就放心走人喇!
一放工即係返去睇BuBu,佢不知幾龍精虎猛,玩得,食得,瞓得,真係累我嚇餐飽!
