日記 2006年07月31日
實在太眼瞓了, 腦海中仲不斷play緊惡作劇之吻, 但係返到公司見到啲e-mail不得不醒, 實在太多report, 而且又要進行每個月都要做嘅三”合”工程,呢個三”合”工程拍得住嗰個三”峽”工程咁大型架!
放工仲要去埋”寵物城”入下貨, 主要都係因為要幫BuBu買個新廁所, 最後買咗個青BB顏色俾佢, 不過BuBu要等到星期五送貨之後, 先可以享用呀!
BuBu仲託我幫佢買份禮物送俾佢個新老友Woffy小姐, 希望佢鍾意啦!
(0)
日記 2006年07月29日
哇,今日一起身已經兩點鐘,望出去仲落緊雨,最適合留喺屋企抖下,不過之前應承咗老陳陪佢去睇套戲,所以非出街不可,啱啱好嘆個茶,就可以夠鐘睇喇!
老陳要睇嗰套戲,咪就係差不多陪住佢成長嘅“龍虎門”囉,
—-> 
佢就最鍾意睇打戲架喇,話哂有甄子丹喎,不過套戲真係超正,超勁,冇悶場,甄子丹又型,—-> 
總之就係Good Good Good啦!
返到屋企梗係嚟番個”請勿騷擾”嘅㷛碟時間啦!
最後提提大家,我個Blog轉咗背景音樂喇,呢首歌係Hata先生曾經介紹俾我聽的!
係日劇”With Love”嘅主題曲!
日記 2006年07月28日
好嘢, 終於買咗”惡作劇之吻”喇, 突然走去買, 都係因為真係需要揾D嘢Relax下, 有時間想打番兩鋪機, 仲要係打打殺殺嗰隻Game㖭呀!
有時真係唔明D人, 次次都唔理你唔應你, 好似個耳窿塞住成堆”X”<---(核突嘢自己諗下係乜), 識應你嗰D人就句句"頂心摻", 更離普嘅就係當正自己好似高官, 係佢哋心目中其他人只係草民一名, 諗嘢又膚淺!
唔通真係要—”各家自掃門前雪“!
(那麽我要”臘”定把掃把了!)
日記 2006年07月27日
今日自己都覺得著得求其咗啲, 因為見落大雨, 所以破天荒喺平日著咗對”人字拖”, 返到公司史密夫仲問我係咪去耕田㖭! 哈哈!
終於派咗喇, 真係多謝公司一直以嚟對我嘅賞識同照顧, 喺度學咗好多嘢, 更加多謝PP島當時咁大膽請一個淨係識得笑嘅朦丙, 即係我呀, 仲要辛苦哂隅言小姐, 總之就乜人都多謝啦!
放工撞正同胡迪一部Lift, 吹咗兩句水, 諗諗下喺呢度做咗半年, 都算係第一次同佢搭同一部Lift喇!
日記 2006年07月26日
今日嗰班”A”字膊齊哂人喺度, 攪到個氣氛好似唔知點咁, 就好似明明出面陽光普照, 但晏晝都即刻天黑黑落起雨嚟咁!
“地球先生病咗, 唔知佢會唔會好番呢?”
PP島今日病咗冇返工, 尋日佢都唔係好得架喇, 休息下吧, 有D咩好番先再做啦, 身體要緊嘛!
祝PP島, 早日康復! (花花要好好照顧島主呀!)
放工諗住搭車瞓番個靚覺, 點知撞正兩個講嘢”姣”到死嘅男仔坐正我後面大大聲傾計, 都唔知係咪斷背㖭呀! 結果我要較番大聲部MP3先瞓得着, 真黑仔, 如果有靜音巴士就好喇!
呀仲有要多謝豬頭B晨早的禮物— 好多狗狗做封面嘅Note Book!
日記 2006年07月25日
今日仍然超眼瞓, 上車瞓到落車, 返到公司又要繼續忙碌喇!
食完Lunch之後, PP島叫我幫佢睇住佢隻”煤炭屎鬼“咪俾佢走佬, 我就趁呢個機會影低佢喇—> 
其實係一個黑色嘅毛毛球電話繩嚟㗎,—-> 
(不過我叫佢做”煤炭屎鬼“, 等佢生動啲嘛! )
仲有我今日更加肯定咗一件事, 原來我同亞B有心靈相通架, 大家只要對望, 唔夠嘅話, 打多個眼色, 即刻唔駛講…明哂, 簡直掂掂掂呀! 諗番起都笑死!
